Marta kostyuk: टेनिस विश्वातील प्रतिष्ठेची मानली जाणारी ‘माद्रिद ओपन 2026’ स्पर्धा युक्रेनच्या मार्टा कोस्त्युक हिनं जिंकून इतिहास रचला आहे. शनिवारी (२ मे) रात्री पार पडलेल्या महिला एकेरीच्या रोमांटक अंतिम सामन्यात कोस्त्युकनं रशियाची 19 वर्षीय उदयोन्मुख खेळाडू मिरा आंद्रेवाचा सरळ सेटमध्ये पराभव केला. कोस्त्युकच्या कारकिर्दीतील हे पहिलेच ‘WTA 1000’ श्रेणीतील विजेतेपद आहे.
स्पेनमधील ‘काजा मॅजिका’ स्टेडियमवर झालेल्या या सामन्यात 23 वर्षीय कोस्त्युकनं सुरुवातीपासूनच आक्रमक खेळ केला. पहिल्या सेटमध्ये तिनं आंद्रेवाच्या सर्व्हिसवर दडपण निर्माण करत 6-3 अशी आघाडी घेतली. दुसऱ्या सेटमध्ये मात्र 19 वर्षीय आंद्रेवानं जोरदार पुनरागमन केलं होतं, पण कोस्त्युकनं आपला अनुभव पणाला लावत शेवटचा पॉईंट घेऊन विजेतेपदावर शिक्कामोर्तब केलं. विजयानंतर तिनं लाल मातीवर ‘बॅकफ्लिप’ मारून आपला आनंद साजरा केला, ज्याची सध्या सोशल मीडियावर मोठी चर्चा आहे.
HAVE YOU EVER SEEN ANYTHING LIKE THIS 🫢
— Tennis Channel (@TennisChannel) May 2, 2026
Marta Kostyuk's Madrid celebration is ICONIC 👑#MMOPEN pic.twitter.com/17XXwyGDbz
रँकिंगमध्ये मोठी झेप
या विजयामुळे मार्टा कोस्त्युकनं जागतिक टेनिस क्रमवारीत (WTA Rankings) मोठी झेप घेतली असून ती आता 15 व्या स्थानावर पोहोचली आहे. हे तिच्या कारकिर्दीतील आतापर्यंतचे सर्वोत्तम मानांकन आहे. माद्रिद ओपन जिंकणारी ती टॉप-20 रँकिंगच्या बाहेर असलेली इतिहासातील फक्त दुसरी खेळाडू ठरली आहे.
विजयानंतर बोलताना कोस्त्युक भावूक झाली होती. तिनं आपलं हे विजेतेपद युद्धग्रस्त युक्रेनमधील लोकांसाठी समर्पित केलं. “हा विजय फक्त माझ्यासाठी नाही, तर माझ्या देशासाठी आहे,” असं तिनं नमूद केलं. या जेतेपदामुळे आगामी ‘फ्रेंच ओपन’साठी ती आता मुख्य दावेदारांपैकी एक मानली जात आहे.
आणखी हेही वाचा
जॅनिक सिनर ‘असं’ करणारा ठरला सहावा खेळाडू!-https://agcsport.tv/tennis/janik-sinner-became-the-sixth-player-to-do-so/
