Norve Chess 2026: नॉर्वेची राजधानी ओस्लो येथील प्रसिद्ध ‘डीचमन ब्योर्विका’ सार्वजनिक ग्रंथालयात सुरू असलेल्या प्रतिष्ठित नॉर्वे बुद्धिबळ २०२६ (Norway Chess) स्पर्धेत रविवार, ३१ मे २०२६ रोजी भारतासाठी एक अत्यंत अत्यंत निराशाजनक दिवस ठरला. स्पर्धेच्या सहाव्या फेरीत भारताचे दोन्ही प्रमुख पुरुष खेळाडू आर. प्रज्ञानंद, डी. गुकेश आणि महिला गटात आघाडीवर असलेल्या दिव्या देशमुख यांना आपापल्या क्लासिकल लढतींमध्ये थेट पराभवाचा धक्का बसला आहे.
ओपन गटामध्ये भारताचा १८ वर्षीय ग्रँडमास्टर आर. प्रज्ञानंदचा सामना अमेरिकेच्या वेस्ली सो (Wesley So) विरुद्ध झाला. एका प्रदीर्घ आणि गुंतागुंतीच्या एंडगेम लढतीमध्ये वेस्ली सो यानं अचूक चाली खेळत प्रज्ञानंदचा थेट ३-० असा पराभव केला. दुसऱ्या बाजूला, विद्यमान जागतिक विजेता डी. गुकेशला देखील जर्मनीच्या व्हिन्सेंट कीमर (Vincent Keymer) कडून पराभवाचा सामना करावा लागला. कीमरनं सुरुवातीपासूनच गुकेशवर दबाव कायम ठेवत या हंगामातील आपला पहिला विजय मिळवला.
महिला गटामध्ये भारताला मोठा झटका बसला असून, आतापर्यंत अव्वल स्थानी असलेल्या दिव्या देशमुखला महिला जागतिक चॅम्पियन चीनच्या जू वेनजुन (Ju Wenjun) कडून ५ तासांच्या थरारानंतर पराभूत व्हावं लागलं. तर दुसरीकडे, अनुभवी कोनेरू हंपीचा कझाकिस्तानच्या बिबिसारा अस्सौबायेवाविरुद्धचा क्लासिकल सामना ड्रॉ झाला, मात्र ‘आर्मागेडॉन’ (Armageddon) टायब्रेकरमध्ये बिबिसारानं हंपीला धूळ चारली.
गुणतालिका
रविवारी झालेल्या निर्णायक निकालानंतर ओपन गटामध्ये प्रज्ञानंदला हरवून वेस्ली सो ११.५ गुणांसह गुणतालिकेत पहिल्या स्थानावर पोहोचला आहे. तर दुसऱ्या महत्त्वपूर्ण सामन्यात जागतिक अव्वल मानांकित मॅग्नस कार्लसननं फ्रान्सच्या अलिरेझा फिरौजाला थेट क्लासिकल सामन्यात पराभूत करत आपलं आव्हान कायम राखलं आहे. महिला गटामध्ये बिबिसारा अस्सौबायेवा ९.५ गुणांसह पुन्हा एकदा अव्वल स्थानी आली असून दिव्या देशमुख ८.५ गुणांसह दुसऱ्या क्रमांकावर घसरली आहे.
आज (१ जून) होणाऱ्या सातव्या फेरीत भारतीय खेळाडू या पराभवातून सावरून जोरदार पुनरागमन करण्याच्या इराद्यानं कोर्टवर उतरतील. तसेच बुद्धिबळ चाहत्यांना आशा आहेत की, भारताचे सगळे खेळाडू आज होणाऱ्या सामन्यात जोरदार पुनरागमन करतील.
