IND vs Sl A: काल (९ जून) श्रीलंकेतील दांबुला आंतरराष्ट्रीय क्रिकेट स्टेडियमवर खेळवल्या गेलेल्या त्रिदेशीय एकदिवसीय मालिकेच्या (Tri-Nation ODI Series) सलामीच्या सामन्यात ‘भारत अ’ (India A) संघानं यजमान श्रीलंका ‘अ’ (Sri Lanka A) संघाचा ८ धावांनी पराभव करत थरारक विजय मिळवला आहे. भारतीय संघानं शेवटच्या षटकांमध्ये जबरदस्त पुनरागमन करत यजमान संघाच्या तोंडातून हा विजय हिरावून घेतला.
या सामन्यात यजमान श्रीलंका ‘अ’ संघानं टॉस जिंकून प्रथम गोलंदाजी करण्याचा निर्णय घेतला, ज्यामुळे ‘भारत अ’ संघाला पहिली फलंदाजी करावी लागली. सुरुवातीला वैभव सुर्यवंशी आणि प्रभासिमरन सिंग हे दोन्ही सलामीवीर स्वस्तात बाद झाल्यानंतर ऋतुराज गायकवाड आणि कर्णधार तिलक वर्मा यांनी चौथ्या विकेटसाठी १५० धावांची वादळी भागीदारी रचली. या दोघांच्या जीवावर भारतानं निर्धारित ५० षटकांत ६ गड्यांच्या मोबदल्यात २७७ धावांचं मजबूत आव्हान उभं केलं.
प्रत्युत्तरात २७८ धावांच्या आव्हानाचा पाठलाग करण्यासाठी उतरलेल्या श्रीलंका ‘अ’ संघाची सुरुवात चांगली झाली होती. मात्र, भारतीय फिरकीपटूंनी अचूक मारा करत त्यांना रोखून धरलं. संपूर्ण श्रीलंका ‘अ’ संघ ४८.५ षटकांत २६९ धावांवर ऑलआऊट झाला, ज्यामुळे भारतानं ८ धावांनी विजय साकारला.
ऋतुराज गायकवाडची शतकी खेळी
या संपूर्ण सामन्यात भारताचा सलामीवीर ऋतुराज गायकवाड यानं सर्वाधिक १०१ धावांची (११४ चेंडू, ६ चौकार, ३ षटकार) संयमी आणि शतकी खेळी खेळली. त्याला कर्णधार तिलक वर्मानं ९७ चेंडूंत ६० धावांचं मोलाचं योगदान दिलं. तर श्रीलंकेकडून कर्णधार सहान अराच्चिगेनं सर्वाधिक ७४ धावा केल्या.
सामना कुठे फिरला?
एकवेळ श्रीलंका ‘अ’ संघ सहान अराच्चिगेच्या जोरावर विजयाच्या उंबरठ्यावर होता. मात्र, सामन्याच्या शेवटच्या टप्प्यात वेगवान गोलंदाज अंशल कंबोजनं अराच्चिगेला एका अचूक यॉर्करवर बोल्ड केलं आणि सामना भारताच्या बाजूनं फिरला. त्यानंतर अंतिम षटकात अर्शद खाननं घातक गोलंदाजी करत अवघ्या १० चेंडूंच्या आत श्रीलंकेचं शेवटचे ४ बळी टिपून भारताच्या विजयावर शिक्कामोर्तब केलं. भारताकडून फिरकीपटू आयुष बदोनी आणि अनुकुल रॉय यांनी प्रत्येकी २-२ बळी घेतले.
