French Open 2026: पॅरिसमधील ‘कोर्ट फिलिप-शॅटरियर’ मैदानावर सुरू झालेल्या प्रतिष्ठित फ्रेंच ओपन (Roland Garros 2026) ग्रँड स्लॅम टेनिस स्पर्धेत जगातील महान खेळाडू नोव्हाक जोकोविचनं (Novak Djokovic) विजयी सलामी दिली आहे. उजव्या खांद्याच्या गंभीर दुखापतीमुळे तब्बल दोन महिने टेनिस कोर्टपासून दूर राहिलेल्या जोकोविचनं उत्कृष्ट पुनरागमन केलं. पुरुष एकेरीच्या पहिल्या फेरीतील अटीतटीच्या लढतीत त्यानं स्थानिक खेळाडूचा, म्हणजेच फ्रान्सच्या जिओवानी एम्पेत्शी पेरिकार्डचा (Giovanni Mpetshi Perricard) पराभव केला. हा त्याचा सामना 24 मे ला पार पडला.
असा मिळवला जोकोविचनं विजय
जवळपास 2 तास 51 मिनिटे चाललेल्या या रोमांचक सामन्यात तिसऱ्या मानांकित जोकोविचनं पेरिकार्डवर 5-7, 7-5, 6-1, 6-4 असा विजय मिळवला. पहिल्या सेटमध्ये पेरिकार्डनं आपल्या वेगवान सर्व्हिसच्या जोरावर 7-5 अशी बाजी मारून इतिहास रचला आहे, कारण गेल्या 17 वर्षांत फ्रेंच ओपनच्या पहिल्या फेरीत जोकोविचविरुद्ध सेट जिंकणारा तो पहिलाच फ्रेंच खेळाडू ठरला. मात्र, दुसऱ्या सेटपासून जोकोविचनं आपल्या ट्रेडमार्क बचावात्मक शैलीचा वापर करत अप्रतिम पलटवार केला. त्यानं अचूक ड्रॉप शॉट्स खेळत दुसरा सेट 7-5 नं जिंकून सामन्यात बरोबरी साधली. यानंतर शारीरिकदृष्ट्या थकलेल्या पेरिकार्डला कोणतीही संधी न देता जोकोविचनं पुढील दोन्ही सेट 6-1, 6-4 अशा मोठ्या फरकानं जिंकून शानदार विजयाची नोंद केली.
सामन्यानंतर जोकोविचची प्रतिक्रिया
39 वर्षांच्या जोकोविचनं या सामन्याद्वारे टेनिस इतिहासात सर्वात जास्त (82 व्या) ग्रँड स्लॅम स्पर्धेत भाग घेण्याचा रॉजर फेडररचा सर्वकालीन महाविक्रम मोडीत काढला. विजयानंतर पेरिकार्डच्या ताकदीचं कौतुक करताना जोकोविच म्हणाला, “त्याच्या सर्व्हिसची गती आणि अचूकता खरोखरच विस्मयकारक होती, त्यानं माझ्यासाठी सामना अत्यंत कठीण केला होता.”
या विजयानंतर आता जोकोविचचा दुसऱ्या फेरीचा सामना बुधवार, 27 मे 2026 रोजी फ्रान्सच्याच व्हॅलेंटाईन रॉयर (Valentin Royer) विरुद्ध खेळवला जाणार आहे.
