रोनाल्डोचा ऐतिहासिक विश्वविक्रम; उझबेकिस्तानवर पोर्तुगालचा दणदणीत विजय

Fifa world cup 2026: अमेरिका, कॅनडा आणि मेक्सिकोमध्ये सुरू असलेल्या फिफा विश्वचषक २०२६ (FIFA World Cup 2026) स्पर्धेत पोर्तुगाल संघानं पुनरागमन केलं आहे. २३ जून २०२६ रोजी ‘गट क’ (Group K) मधील खेळवल्या गेलेल्या रोमांचक सामन्यात पोर्तुगालनं उझबेकिस्तानचा ५-० असा दारूण पराभव केला. अमेरिकेतील टेक्सास येथील प्रसिद्ध ह्युस्टन स्टेडियमवर (NRG Stadium) हा एकतर्फी सामना पार पडला. पहिल्या सामन्यात काँगोविरुद्ध १-१ अशी बरोबरी पत्करावी लागल्यानं टीकेचे धनी ठरलेल्या पोर्तुगालनं या विजयानं टीकेकारांना चोख उत्तर दिलं आहे.

या सामन्यात पोर्तुगालनं सुरुवातीलपासूनच आक्रमक खेळ करत उझबेकिस्तानची बचावफळी मोडीत काढली. पोर्तुगालकडून ख्रिस्तियानो रोनाल्डोनं (Cristiano Ronaldo) सर्वाधिक २ गोल केले. ६ व्या मिनिटाला जुआन कॅन्सेलोच्या पासवर रोनाल्डोनं पहिला गोल करत संघाचे खाते उघडले. त्यानंतर १७ व्या मिनिटाला नुनो मेंडेसनं (Nuno Mendes) फ्री-किकद्वारे अप्रतिम गोल करत आघाडी २-० केली. ३९ व्या मिनिटाला ब्रुनो फर्नांडिसच्या पासवर रोनाल्डोनं वैयक्तिक दुसरा आणि संघाचा तिसरा गोल डागला. उत्तरार्धात ६० व्या मिनिटाला उझबेकिस्तानचा गोलरक्षक नेमातोव्हकडून झालेला आत्मघातकी गोल (Own Goal) आणि ८७ व्या मिनिटाला राफेल लिआओनं (Rafael Leão) केलेल्या गोलमुळे पोर्तुगालनं ५-० अशा मोठ्या विजयावर शिक्कामोर्तब केलं.

रोनाल्डोचे ऐतिहासिक जागतिक विक्रम
४१ वर्षीय महान फुटबॉलपटू ख्रिस्तियानो रोनाल्डोनं या सामन्यात २ गोल करत फुटबॉल विश्वात नवा इतिहास रचला आहे. रोनाल्डो फुटबॉलच्या इतिहासात तब्बल ६ वेगवेगळ्या फिफा विश्वचषक (२००६ ते २०२६) स्पर्धांमध्ये गोल करणारा जगातील पहिला एकमेव खेळाडू बनला आहे. लिओनेल मेस्सीनं ६ विश्वचषक खेळले असले तरी तो २०१० मध्ये गोल करू शकला नव्हता.

युसेबिओचा विक्रम मोडला: विश्वचषकातील १० व्या गोलसह रोनाल्डोनं दिग्गज युसेबिओला (९ गोल) मागे टाकत विश्वचषकात पोर्तुगालसाठी सर्वाधिक गोल करणारा खेळाडू बनण्याचा मान मिळवला. तसेच विश्वचषक इतिहासातील गोल करणारा दुसरा सर्वात वृद्ध खेळाडू ठरला आहे.

या मोठ्या विजयामुळे पोर्तुगालनं ‘ग्रुप के’ मध्ये ४ गुणांसह बाद फेरीच्या (Round of 32) दिशेनं भक्कम पाऊल टाकलं आहे, तर पदार्पण करणाऱ्या उझबेकिस्तानचे आव्हान संपुष्टात आलं आहे. पोर्तुगालचा पुढील शेवटचा ग्रुप सामना शनिवार, २७ जून २०२६ रोजी कोलंबियाविरुद्ध खेळवला जाणार आहे.