१९ वर्षांच्या जोआओ फोन्सेकाकडून नोव्हाक जोकोविचचा पराभव

French Open 2026: पॅरिसमधील प्रसिद्ध ‘कोर्ट फिलिप-शॅटरियर’ मैदानावर सुरू असलेल्या प्रतिष्ठित फ्रेंच ओपन 2026 (Roland Garros) ग्रँड स्लॅम टेनिस स्पर्धेत टेनिस जगताला हादरवून टाकणारा सर्वात मोठा उलटफेर पाहायला मिळाला आहे. काल शुक्रवार, 29 मे 2026 रोजी झालेल्या पुरुष एकेरीच्या तिसऱ्या फेरीच्या (Round 3) लढतीत 24 वेळच्या ग्रँड स्लॅम विजेत्या नोव्हाक जोकोविचचा (Novak Djokovic) पराभव झाला आहे. ब्राझीलच्या 19 वर्षीय उदयोन्मुख टेनिस स्टार जोआओ फोन्सेकानं (Joao Fonseca) जोकोविचला पराभवाची धूळ चारत स्पर्धेतून बाहेर काढलं आहे.

दोन सेट जिंकूनही पराभव
तब्बल 4 तास 53 मिनिटे चाललेल्या या लांब आणि थरारक सामन्यात 28 व्या मानांकित जोआओ फोन्सेकानं जोकोविचवर 4-6, 4-6, 6-3, 7-5, 7-5 अशी अद्भूत मात करत विजय मिळवला. सामन्याच्या सुरुवातीला 39 वर्षीय अनुभवी जोकोविचनं उत्कृष्ट खेळ करत पहिले दोन्ही सेट 6-4, 6-4 असे सहज जिंकले होते. मात्र, तिसऱ्या सेटपासून फोन्सेकानं आपल्या ताकदवान फोरहँड शॉटच्या जोरावर सामन्याचं चित्र पालटलं. त्यानं एकूण 46 विनर्स मारत पुढील दोन्ही सेट जिंकून सामन्यात 2-2 अशी बरोबरी साधली. निर्णायक पाचव्या सेटमध्ये जोकोविचनं सुरुवातीला ब्रेक मिळवून 3-1 अशी आघाडी घेतली होती, पण फोन्सेकानं जिद्दीनं खेळत जोकोविचची सर्व्हिस मोडीत काढली. अखेर 5-5 अशी बरोबरी असताना फोन्सेकानं पुन्हा जोकोविचची सर्व्हिस ब्रेक केली आणि सलग 3 एसीस (Aces) मारून ऐतिहासिक विजयावर शिक्कामोर्तब केलं.

ऐतिहासिक रेकॉर्ड आणि जोकोविचची प्रतिक्रिया
या ऐतिहासिक विजयासह जोआओ फोन्सेका हा ग्रँड स्लॅमच्या इतिहासात नोव्हाक जोकोविचला दोन सेटच्या पिछाडीवरून हरवणारा जगातील पहिलाच तरुण (Teenager) खेळाडू ठरला आहे. तसेच, 1968 नंतर टेनिसच्या इतिहासात पहिल्यांदाच कोणत्याही माजी ग्रँड स्लॅम विजेत्याशिवाय पुरुष एकेरीची चौथी फेरी खेळवली जाईल. सामन्यानंतर जोकोविचनं प्रतिस्पर्ध्याचं कौतुक करताना म्हटलं, “महत्त्वाच्या आणि निर्णायक क्षणांमध्ये फोन्सेका नक्कीच सरस खेळाडू ठरला, त्यानं अप्रतिम शॉट्स मारले.”

या पराभवामुळे जोकोविचचं 25 वे ऐतिहासिक ग्रँड स्लॅम विजेतेपद पटकावण्याचं स्वप्न पुन्हा एकदा अपूर्ण राहिलं आहे.