Asian Elite Boxing Championships 2026: मंगोलियातील उलानबातर येथे सुरू असलेल्या आशियाई एलिट बॉक्सिंग चॅम्पियनशिप 2026 मध्ये भारतीय पुरुष बॉक्सर्सनंही सुवर्ण कामगिरी केली आहे. भारताचा युवा बॉक्सर विश्वनाथ सुरेश (vishwanath suresh) यानं 50 किलो वजनी गटात जपानच्या दाइची इवाईचा पराभव करून सुवर्णपदकावर नाव कोरलं आहे.
मंगोलियाची राजधानी उलानबातर येथे 11 एप्रिल 2026 रोजी झालेल्या पुरुषांच्या 50 किलो वजनी गटाच्या अंतिम सामन्यात भारताच्या विश्वनाथ सुरेशनं ऐतिहासिक सुवर्णपदक (Gold Medal) पटकावलं आहे. विश्वनाथनं अंतिम फेरीत जपानच्या ताकदवान खेळाडू दाइची इवाई (Daichi Iwai) याचा 5-0 अशा एकतर्फी फरकानं पराभव केला. विश्वनाथनं संपूर्ण सामन्यात आपला वेग आणि अचूक पंचांच्या जोरावर जपानी खेळाडूला पुनरागमनाची कोणतीही संधी दिली नाही. पंचांनी एकमतानं विश्वनाथला विजयी घोषित केलं, ज्यामुळे भारतीय संघात आणि चाहत्यांमध्ये आनंदाचं वातावरण पसरलं आहे.
विश्वनाथची विजयानंतरची प्रतिक्रिया
विजयानंतर अत्यंत भावूक झालेल्या विश्वनाथनं ही कामगिरी आपल्या प्रशिक्षकांना आणि देशाला समर्पित केली आहे. तो म्हणाला, “माझ्यासाठी हे फक्त पदक नाही, तर माझ्या अनेक वर्षांच्या परिश्रमाचं फळ आहे. जपानी खेळाडू तंत्रशुद्ध होता, पण मला माझ्या खेळावर आणि प्रशिक्षकांच्या रणनीतीवर पूर्ण विश्वास होता. रिंगमध्ये भारताचा तिरंगा डौलानं फडकताना पाहणं, हा माझ्या आयुष्यातील सर्वात अभिमानाचा क्षण आहे.”
विश्वनाथच्या आयुष्याविषयी थोडक्यात माहिती
विश्वनाथ सुरेश हा मूळचा चेन्नई येथील असून त्याचा क्रीडा प्रवास अतिशय खडतर राहिला आहे. त्याचे वडील एक रिक्षाचालक आहेत, मात्र आपल्या मुलाच्या स्वप्नासाठी त्यांनी कधीही पैशांची कमतरता भासू दिली नाही. विश्वनाथनं यापूर्वी ज्युनियर स्तरावर देखील जागतिक सुवर्णपदक जिंकून आपली गुणवत्ता सिद्ध केली होती. अत्यंत प्रतिकूल परिस्थितीतून येऊन आशियाई स्तरावर सुवर्ण यश संपादन करणाऱ्या विश्वनाथनं आज तरुणाईसमोर एक नवा आदर्श ठेवला आहे.
या विजयामुळे भारताच्या खात्यात आणखी एका सुवर्णपदकाची भर पडली आहे. आशियाई एलिट बॉक्सिंग चॅम्पियनशिप 2026 या स्पर्धेत भारतानं महिला आणि पुरुष दोन्ही गटात मिळून आतापर्यंत 6 सुवर्ण पदकं पटकावली आहेत. विश्वनाथचा हा विजय आगामी 2028 ऑलिम्पिकच्या दृष्टीनं भारतासाठी अत्यंत महत्त्वाचं मानलं जात आहे.
