Norway Chess 2026: नॉर्वेची राजधानी ओस्लो येथील ‘डीचमन ब्योर्विका’ सार्वजनिक ग्रंथालयात काल 25 मे 2026 रोजी सुरू झालेल्या प्रतिष्ठित नॉर्वे बुद्धिबळ 2026 (Norway Chess) स्पर्धेच्या पहिल्या फेरीत भारतीय खेळाडूंनी कमालीच्या चुरशीनंतर शानदार सुरुवात केली आहे. भारताचा विद्यमान जागतिक विजेता डी. गुकेश आणि युवा स्टार आर. प्रज्ञानंद यांनी आपापल्या लढतींमध्ये क्लासिकल डाव ड्रॉ झाल्यानंतर ‘आर्मागेडॉन’ (Armageddon) टायब्रेकरमध्ये जबरदस्त विजय मिळवून अतिरिक्त गुण पटकावले.
पहिल्या फेरीतील भारताची कामगिरी
‘ओपन’ गटामध्ये जागतिक विजेता डी. गुकेशचा सामना जर्मनीच्या व्हिन्सेंट कीमरविरुद्ध झाला. क्लासिकल डावात कीमरनं गुकेशवर प्रचंड दबाव आणला होता, मात्र गुकेशनं अप्रतिम बचाव करत सामना ड्रॉ केला आणि नंतर आर्मागेडॉनमध्ये कीमरला मात दिली. दुसऱ्या बाजूला, आर. प्रज्ञानंदनं अमेरिकेच्या बलाढ्य वेस्ली सो विरुद्ध क्लासिकल डाव अनिर्णित राखल्यानंतर आर्मागेडॉनमध्ये आक्रमक खेळ करत शानदार विजय मिळवला. महिला गटामध्ये भारताच्या दिव्या देशमुखनं अप्रतिम कामगिरी करताना महिला जागतिक चॅम्पियन चीनच्या जू वेनजुनला आर्मागेडॉनमध्ये पराभवाचा धक्का दिला. मात्र, अनुभवी कोनेरू हंपीला कझाकिस्तानच्या बिबिसारा अस्सौबायेवाकडून क्लासिकल डावात पराभवाचा सामना करावा लागला.
स्पर्धेच्या पहिल्याच दिवशी सर्वात मोठा उलटफेर पाहायला मिळाला, जिथे फ्रान्सच्या अलिरेझा फिरौजा यानं जागतिक क्रमवारीत अव्वल असलेल्या आणि स्थानिक खेळाडू मॅग्नस कार्लसनचा क्लासिकल डावात अवघ्या 38 चालींमध्ये पराभव केला. या थेट क्लासिकल विजयामुळे फिरौजा 3 गुणांसह ओपन गटामध्ये अव्वल स्थानावर आहे, तर गुकेश आणि प्रज्ञानंद प्रत्येकी 1.5 गुणांसह संयुक्तपणे दुसऱ्या स्थानावर आहेत. महिला गटामध्ये कोनेरू हंपीला हरवणारी बिबिसारा 3 गुणांसह अव्वल स्थानी असून दिव्या देशमुख 1.5 गुणांसह दुसऱ्या क्रमांकावर आहे.
आज खेळवल्या जाणाऱ्या दुसऱ्या फेरीत प्रज्ञानंदचा सामना अव्वल स्थानी असलेल्या अलिरेझा फिरौजाशी होईल, तर मॅग्नस कार्लसन पुनरागमन करण्यासाठी व्हिन्सेंट कीमरविरुद्ध खेळेल. महिला गटामध्ये दिव्या देशमुख आणि कोनेरू हंपी यांच्यात रोमांचक भारतीय लढत पाहायला मिळणार आहे.
