Mary Kom: भारतीय बॉक्सिंगची दिग्गज खेळाडू आणि सहा वेळची जागतिक विजेती एम. सी. मेरी कोम हिनं व्यावसायिक (Professional) बॉक्सिंगमध्ये प्रवेश करण्याचे संकेत दिले आहेत. हौशी (Amateur) बॉक्सिंगमधील वयोमर्यादेच्या नियमामुळे तिला आता आंतरराष्ट्रीय स्तरावर भारताचं प्रतिनिधित्व करता येत नाही, त्यामुळे तिनं हा नवीन मार्ग निवडण्याचा विचार सुरू केला आहे.
मेरी कोमनं रविवारी, 29 मार्च 2026 रोजी नवी दिल्लीत आयोजित ‘संडेज ऑन सायकल’ (Sundays on Cycle) या कार्यक्रमाच्या निमित्तानं माध्यमांशी संवाद साधताना हा मोठा खुलासा केला. “हौशी बॉक्सिंगचा दरवाजा वयोमर्यादेमुळे बंद झाला असला तरी, प्रोफेशनल बॉक्सिंगच्या रूपानं एक नवीन संधी माझ्यासमोर आली आहे,” असं तिनं यावेळी नमूद केलं.
व्यावसायिक बॉक्सिंग का निवडली?
आंतरराष्ट्रीय बॉक्सिंग असोसिएशनच्या (IBA) नियमांनुसार, हौशी स्तरावर 40 वर्षांनंतर खेळाडूंना अधिकृत स्पर्धांमध्ये खेळता येत नाही. मेरी कोम आता 43 वर्षांची आहे, त्यामुळे ती ऑलिम्पिक किंवा विश्वचषकात खेळू शकत नाही. मेरी कोम म्हणाली की, तिच्यामध्ये अजूनही खेळण्याची भूक शिल्लक आहे आणि तिला जगाला दाखवून द्यायचे आहे की ती अजूनही रिंगणात ताकदीने पुनरागमन करू शकते.
जानेवारी 2024 मध्ये मेरी कोमनं निवृत्ती घेतल्याच्या बातम्या आल्या होत्या. मात्र, तिनं लगेच स्पष्टीकरण दिलं होतं की, तिनं स्वतःहून निवृत्ती जाहीर केलेली नाही, तर फक्त वयोमर्यादेच्या नियमामुळे तिला हा निर्णय घ्यावा लागला. ती अजूनही तिच्या फिटनेसवर काम करत असून प्रशिक्षणात व्यस्त आहे.
भारतासाठी कामगिरी
मेरी कोमला ‘मॅग्निफिसेंट मेरी’ म्हणून ओळखलं जातं. 2012 च्या लंडन ऑलिम्पिकमध्ये कांस्य पदक जिंकणारी ती पहिली भारतीय महिला बॉक्सर ठरली. तिनं विक्रमी सहा वेळा जागतिक सुवर्णपदक पटकावलं आहे. भारत सरकारनं तिला पद्मविभूषण (2020), पद्मभूषण (2013) आणि पद्मश्री (2006) या नागरी पुरस्कारांनी गौरवलं आहे. तिला देशाचा सर्वोच्च क्रीडा सन्मान ‘राजीव गांधी खेलरत्न’ (आताचा मेजर ध्यानचंद खेलरत्न) 2009 मध्ये प्रदान करण्यात आला होता.
