Wisden Cricketer’s Almanack: क्रिकेट विश्वातील अत्यंत मानाचा म्हणून ओळखल्या जाणाऱ्या ‘विस्डन क्रिकेटर्स अल्मनॅक’च्या 2025 च्या आवृत्तीत भारतीय खेळाडूंनी अभूतपूर्व इतिहास रचला आहे. विस्डननं जाहीर केलेल्या वर्षातील पाच सर्वोत्कृष्ट क्रिकेटपटूंच्या (Wisden Five Cricketers of the Year) प्रतिष्ठित यादीत यंदा तब्बल चार भारतीय खेळाडूंचा समावेश करण्यात आला आहे. शुभमन गिल, ऋषभ पंत, मोहम्मद सिराज आणि रवींद्र जडेजा या भारतीय चौकडीनं आपल्या बॅट आणि बॉलच्या जोरावर जागतिक क्रिकेटवर भारताचं नाव सुवर्णअक्षरांनी कोरलं आहे. या यादीत स्थान मिळवणारा एकमेव इंग्लिश खेळाडू म्हणून हसीब हमीद याची निवड झाली आहे.
विस्डनचे हे पुरस्कार प्रामुख्यानं मागील हंगामातील इंग्लंडमधील कामगिरीवर आणि जागतिक प्रभावावर आधारित असतात. भारत आणि इंग्लंड दरम्यान झालेली कसोटी मालिका 2-2 अशा बरोबरीत सुटली होती, ज्यामध्ये या चार भारतीय खेळाडूंनी चकित करणारा खेळ दाखवला होता.
शुभमन गिलनं या हंगामात 754 धावांचा डोंगर उभारत विस्डनच्या परीक्षकांना प्रभावित केलं. विशेषतः एजबॅस्टन कसोटीत त्यानं खेळलेल्या 269 आणि 161 धावांच्या खेळींनी भारतीय कसोटी इतिहासात नवं पर्व सुरू केलं. त्याच्या तंत्रशुद्ध फलंदाजीमुळे त्याला भारतीय फलंदाजीचा खरा वारसदार म्हणून विस्डननं सन्मानित केलं आहे.
भयंकर अपघातानंतर मैदानावर परतलेल्या ऋषभ पंतनं आपल्या स्फोटक फलंदाजीनं पुन्हा एकदा सर्वांना मंत्रमुग्ध केलं. त्यानं हेडिंग्ले येथे खेळलेल्या दोन सलग शतकी (134 आणि 118) खेळींमुळे भारताला पराभवाच्या छायेतून बाहेर काढलं. कठीण प्रसंगातही निर्भयपणे खेळण्याच्या त्याच्या शैलीची विस्डननं विशेष दखल घेतली आहे.
मोहम्मद सिराज आणि रवींद्र जडेजा
वेगवान गोलंदाज मोहम्मद सिराजनं आपल्या स्विंग आणि वेगाच्या जोरावर इंग्लंडच्या फलंदाजीचा कणा मोडला. त्यानं या मालिकेत घेतलेले निर्णायक बळी भारतासाठी महत्त्वाचे ठरले. दुसरीकडं, जगातील सर्वोत्तम अष्टपैलू म्हणून ओळखल्या जाणाऱ्या रवींद्र जडेजानं आपलं स्थान अधिक भक्कम केलं. त्यानं फलंदाजीत 86 च्या सरासरीनं 516 धावा केल्या तसेच गोलंदाजी आणि क्षेत्ररक्षण या तिन्ही आघाड्यांवर आपलं वर्चस्व गाजवलं.
या भारतीय लाटेत इंग्लंडच्या हसीब हमीदनं आपल्या देशांतर्गत क्रिकेटमधील (काउंटी चॅम्पियनशिप) 1,258 धावांच्या जोरावर स्थान मिळवलं आहे. त्यानं आपल्या संघाला 15 वर्षांनंतर जेतेपद मिळवून देण्यात मोलाचा वाटा उचलला.
विस्डनच्या 162 वर्षांच्या इतिहासात पहिल्यांदाच एकाच वेळी चार भारतीय खेळाडूंचा असा गौरव होणे, ही भारतीय क्रिकेटच्या सुवर्णकाळाची साक्ष आहे. या पुरस्कारांमुळे भारताच्या या खेळाडूंचा दर्जा जागतिक स्तरावर पुन्हा एकदा सिद्ध झाला आहे.
