हैदराबाद: आयपीएल 2026 च्या हंगामात सनरायझर्स हैदराबाद (SRH) संघासाठी एक दिलासादायक बातमी समोर आली आहे. संघाचा नियमित कर्णधार आणि ऑस्ट्रेलियन दिग्गज गोलंदाज पॅट कमिन्स हा लवकरच मैदानात परतणार असल्याचं स्पष्ट झालं आहे. मात्र, चाहत्यांना त्याला प्रत्यक्ष खेळताना पाहण्यासाठी अजून काही दिवस वाट पाहावी लागणार आहे.
पॅट कमिन्स का होता बाहेर?
पॅट कमिन्स गेल्या काही काळापासून मणक्याच्या दुखापतीमुळे (Lumbar bone stress) त्रस्त होता. या गंभीर दुखापतीमुळे तो टी-20 विश्वचषकाला आणि आयपीएलच्या सुरुवातीच्या सामन्यांनाही मुकला आहे. कमिन्सनं या हंगामातील आतापर्यंतचे सर्व 5 सामने गमावले आहेत. सध्या तो ऑस्ट्रेलियात असून तंदुरुस्त होण्यासाठी मेहनत घेत आहे. ताज्या माहितीनुसार, तो 17 एप्रिल रोजी भारतात दाखल होईल, पण लगेच मैदानात उतरणार नाही. ऑस्ट्रेलिया बोर्डानं सोशल मीडियावरून माहिती दिली की, तो 25 एप्रिल रोजी राजस्थान रॉयल्सविरुद्ध होणाऱ्या सामन्यातून अधिकृतपणे पुनरागमन करेल.
इशान किशनकडेच राहणार धुरा
कमिन्सच्या अनुपस्थितीत सध्या भारतीय यष्टिरक्षक इशान किशन संघाचं यशस्वी नेतृत्व करत आहे. पुढच्या दोन सामन्यांतही, म्हणजेच 18 एप्रिलला चेन्नईविरुद्ध आणि 21 एप्रिलला दिल्लीविरुद्धच्या सामन्यात इशान किशनच कर्णधार असेल. जेव्हा कमिन्स 25 एप्रिलला मैदानात उतरेल, तेव्हा तो इशानकडून पुन्हा कर्णधारपदाची सूत्रे आपल्या हाती घेईल.
सनरायझर्स हैदराबादनं या हंगामात आतापर्यंत 5 सामने खेळले असून त्यापैकी 2 सामन्यांत विजय मिळवला आहे, तर 3 सामन्यांत त्यांना पराभवाचा सामना करावा लागला आहे. सध्या 4 गुणांसह संघ गुणतालिकेत चौथ्या स्थानावर आहे. प्रफुल हिंगे आणि साकिब हुसेन यांसारख्या युवा खेळाडूंनी इशान किशनच्या नेतृत्वाखाली चांगली कामगिरी केली आहे.
हैदराबादचा पुढचा सामना शनिवार, 18 एप्रिल 2026 रोजी बलाढ्य चेन्नई सुपर किंग्स (CSK) विरुद्ध होणार आहे. हा सामना हैदराबादच्या घरच्या मैदानावर म्हणजेच ‘राजीव गांधी आंतरराष्ट्रीय स्टेडियमवर’ रंगणार आहे.
आणखी हेही वाचा
कार्लोस अल्काराजची बार्सिलोना ओपनमधून धक्कादायक माघार-https://agcsport.tv/tennis/carlos-alcarazs-shock-withdrawal-from-barcelona-open/
जागतिक महिला चेस वर्ल्ड चॅम्पियनशिपसाठी पात्र ठरणारी पहिली भारतीय-https://agcsport.tv/other/first-indian-to-qualify-for-the-womens-chess-world-championship/
