RCB vs GT IPL 2026: आयपीएल २०२६ (IPL 2026) चा अंतिम सामना आज रविवार, ३१ मे २०२६ रोजी रंगणार आहे. अहमदाबाद येथील नरेंद्र मोदी स्टेडियमवर संध्याकाळी ७:३० वाजता गतविजेता रॉयल चॅलेंजर्स बेंगळुरू (RCB) आणि घरचा संघ गुजरात टायटन्स (GT) यांच्यात हा रोमांचक अंतिम सामना खेळवला जाईल.
फायनलचा इतिहास, हेड-टू-हेड आणि ट्रॉफीज
अंतिम फेरीचा इतिहास पाहिला तर रॉयल चॅलेंजर्स बेंगळुरूचा संघ आपल्या आयपीएल इतिहासातील पाचव्या फायनलसाठी सज्ज झाला आहे. यापूर्वी आरसीबीनं २००९, २०११, २०१६ आणि गेल्या वर्षी २०२५ मध्ये अंतिम फेरी गाठली होती. तर दुसरीकडे, २०२२ मध्ये पदार्पण करणाऱ्या गुजरात टायटन्सची ही तिसरी फायनल आहे. जेतेपदाचा विचार केल्यास, दोन्ही संघांच्या खात्यात सध्या प्रत्येकी १-१ आयपीएल ट्रॉफी जमा आहे. गुजरातनं २०२२ मध्ये तर आरसीबीनं २०२५ मध्ये आपलं पहिलं विजेतेपद जिंकलं होतं. आयपीएलमध्ये या दोन संघांमधील हेड-टू-हेड रेकॉर्ड देखील अत्यंत चुरशीचे राहिले असून, आतापर्यंत झालेल्या ९ सामन्यांपैकी आरसीबीनं ५ तर गुजरातनं ४ सामने जिंकले आहेत.
रजत पाटीदार करणार धोनी-रोहितच्या महाविक्रमाची बरोबरी
आजच्या सामन्यात आरसीबीचा कर्णधार रजत पाटीदार याच्याकडे इतिहास रचण्याची सुवर्णसंधी आहे. आरसीबीनं जर आजचा सामना जिंकून विजेतेपद राखलं, तर पाटीदार हा कर्णधार म्हणून आयपीएलच्या इतिहासात सलग दोन हंगामात (Back-to-Back) ट्रॉफी जिंकणाऱ्या महेंद्रसिंग धोनी आणि रोहित शर्मा यांच्या महाविक्रमाशी बरोबरी करेल. धोनीनं २०१०-२०११ मध्ये चेन्नईला तर रोहितनं २०१९-२०२० मध्ये मुंबईला सलग दोनदा चॅम्पियन बनवलं होतं.
आजच्या सामन्यासाठी दोन्ही संघांची संभाव्य प्लेइंग ११
रॉयल चॅलेंजर्स बेंगळुरू (RCB): विराट कोहली, देवदत्त पडिक्कल, वेंकटेश अय्यर, रजत पाटीदार (कर्णधार), कृणाल पंड्या, जेतेश शर्मा, टिम डेव्हिड, रोमॅरियो शेफर्ड, भुवनेश्वर कुमार, रसिक सलाम दार आणि जोश हेझलवूड.
गुजरात टायटन्स (GT): शुभमन गिल (कर्णधार), साई सुदर्शन, जोस बटलर, राहुल तेवतिया, वॉशिंग्टन सुंदर, निशांत सिंधू, जेसन होल्डर, रशीद खान, कगिसो रबाडा, महम्मद सिराज आणि प्रसिद्ध कृष्णा.
आणखी हेही वाचा
इंग्लंडने भारतावर २६ धावांनी मिळवला विजय, मालिकेत १-१ अशी बरोबरी-https://agcsport.tv/cricket/england-beat-india-by-26-runs-level-series-1-1/
