Super Chess Classic: रोमानियाची राजधानी बुखारेस्ट येथे सुरू असलेल्या प्रतिष्ठित सुपर चेस क्लासिक 2026 बुद्धिबळ स्पर्धेत भारताचा युवा ग्रँडमास्टर आर. प्रज्ञानंदनं (R. Praggnanandhaa) आपली चमक दाखवली आहे. शुक्रवार (15 मे) झालेल्या स्पर्धेच्या दुसऱ्या फेरीत प्रज्ञानंदनं जागतिक अजिंक्यपद स्पर्धेचा आव्हानात्मक खेळाडू (World Championship Challenger) उझबेकिस्तानच्या जावोखिर सिंदारोव्हचा (Javokhir Sindarov) पराभव केला आहे.
या सामन्यात प्रज्ञानंद काळ्या सोंगाट्यांनी (Black Pieces) खेळत होता. सुरुवातीला आणि मध्य टप्प्यात हा सामना बरोबरीच्या (Draw) दिशेनं झुकलेला दिसत होता. सिंदारोव्हनं आक्रमक चाली खेळत आपली रणनीती म्हणून प्रज्ञानंदला घोडा (Knight) बळी देण्याची (Sacrifice) ऑफर दिली. गेल्या महिन्यात सायप्रस येथे झालेल्या ‘फिडे कॅन्डिडेट्स 2026’ स्पर्धेत सिंदारोव्हनं अशाच प्रकारे दोनवेळा प्रज्ञानंदविरुद्ध घोडा बळी देऊन त्याला दोन्ही सामन्यांत पराभूत केलं होतं. मात्र, यावेळी प्रज्ञानंदनं त्याचे सोंगटे स्वीकारले आणि अत्यंत अचूक आणि हुशारीनं बचाव (Defend) केला. सामन्याच्या 36 व्या चालीवर सिंदारोव्हनं हत्ती (Rook) चुकीच्या जागेवर सरकवण्याची एक गंभीर चूक केली, ज्याचा फायदा घेत प्रज्ञानंदनं 42 व्या चालीवर शानदार विजय निश्चित केला.
या पराभवामुळे सिंदारोव्हचा गेल्या वर्षी सप्टेंबरपासून क्लासिकल बुद्धिबळातील सलग 53 सामन्यांचा अजिंक्य राहण्याचा (Unbeaten Streak) ऐतिहासिक रेकॉर्ड मोडीत निघाला आहे. या विजयासह प्रज्ञानंद 2 सामन्यांतून 1.5 गुणांसह गुणतालिकेत संयुक्तपणे अव्वल स्थानावर पोहोचला आहे, कारण पहिल्या फेरीत त्यानं फ्रान्सच्या अलिरेझा फिरौजाविरुद्ध सामना ड्रॉ केला होता.
तिसरी फेरी कधी आणि कोणाविरुद्ध?
गतविजेत्या प्रज्ञानंदचा तिसऱ्या फेरीचा सामना शनिवार, 16 मे 2026 रोजी जर्मनीच्या बलाढ्य ग्रँडमास्टर व्हिन्सेंट कीमर (Vincent Keymer) विरुद्ध होणार आहे. कीमर देखील 1.5 गुणांसह अव्वल स्थानावर असल्यानं बुद्धिबळ चाहत्यांसाठी ही लढत अत्यंत रंगतदार ठरेल.
आणखी हेही वाचा
Thailand open 2026: भारताची एकमेव सात्विक-चिरागची फायनलमध्ये धडक-https://agcsport.tv/other/thailand-open-2026-india-only-satwik-chirag-to-reach-the-final/
