MI vs LSG IPL 2026: आयपीएल 2026 च्या 47 व्या सामन्यात मुंबई इंडियन्सनं (MI) अशक्य वाटणारा विजय शक्य करून दाखवला आहे. घरच्या वानखेडे मैदानावर झालेल्या या लढतीत मुंबईनं लखनऊ सुपर जायंट्सचा (LSG) 6 गडी राखून पराभव केला. लखनऊनं विजयासाठी दिलेल्या 229 धावांचा लक्षाचा पाठलाग करून एक मोठा रेकॉर्ड सुद्धा नावावर केला आहे.
प्रथम फलंदाजीसाठी उतरलेल्या लखनऊ सुपर जायंट्सनं फलंदाजीसाठी नंदनवन असलेल्या वानखेडेच्या खेळपट्टीचा पुरेपूर फायदा घेतला. निकोलस पूरननं अवघ्या 16 चेंडूंत अर्धशतक झळकावत मुंबईच्या गोलंदाजांची अक्षरशः धुव्वा उडवला. त्यानं 21 चेंडूंत 1 चौकार आणि 8 उत्तुंग षटकारांसह 63 धावा मारल्या. त्याला मिचेल मार्श (44) आणि आयुष बदोनी यांनी मोलाची साथ दिली, ज्यामुळे लखनऊनं 20 षटकांत 5 बाद 228 धावांचा डोंगर उभा केला.
229 धावांचं आव्हान समोर असताना मुंबईच्या सलामीवीरांनी सुरुवातीपासूनच आक्रमकता दाखवली. ‘हिटमॅन’ रोहित शर्मा (84 धावा) आणि दक्षिण आफ्रिकेचा युवा फलंदाज रायन रिकलटन (83 धावा) यांनी फक्त 10.5 षटकांत 143 धावांची विक्रमी सलामी दिली. रिकलटननं आपल्या 32 चेंडूंच्या खेळीत 8 षटकार खेचत वानखेडेवर षटकारांचा पाऊस पाडला. या धडाकेबाज सुरुवातीमुळे मुंबईचा विजय साकार झाला. शेवटी नमनधीर आणि विल जॅक्स या जोडीनं 18.4 षटकांतच संघाला विजय मिळवून दिला.
सामन्यातील रेकॉर्ड्स
मुंबई इंडियन्सनं 229 धावांचा पाठलाग करून आयपीएलमधील आपला आतापर्यंतचा सर्वात मोठा विजय नोंदवला आहे. याआधी मुंबईनं केकेआरविरूद्ध (221) सगळ्यात मोठ्या धावांचा पाठलाग केला होता.
मुंबईनं पहिल्या 6 षटकांत 88 धावा केल्या, जो या हंगामातील सर्वोत्तम पॉवरप्ले स्कोअरपैकी एक ठरला.
या संपूर्ण सामन्यात दोन्ही संघांकडून एकूण 32 षटकार मारले गेले.
