“प्रियांश आर्या हा म्हात्रे आणि सूर्यवंशीपेक्षाही सरस खेळाडू!” अश्विनचं मोठं विधान

IPL 2026 R. Ashwin: भारताचा दिग्गज फिरकीपटू आर. अश्विन यानं आयपीएल 2026 मधील युवा खेळाडूंच्या कामगिरीवर आपलं मत व्यक्त केलं आहे. आपल्या अधिकृत YouTube चॅनलवर बोलताना अश्विननं पंजाब किंग्सचा नवा स्टार प्रियांश आर्या याचं भरभरून कौतुक केलं आहे. विशेष म्हणजे, अश्विननं प्रियांशची तुलना यंदा गाजत असलेल्या वैभव सूर्यवंशी (vaibhav Suryawanshi) आणि आयुष म्हात्रे (Ayush Mhatre) यांच्याशी करत, प्रियांश या दोघांपेक्षाही “एक पाऊल पुढे” असल्याचं म्हटलं आहे.

पंजाब किंग्सकडून सलामीला येणाऱ्या प्रियांशनं यंदाच्या हंगामात गोलंदाजांना वेड लावलं आहे. त्यानं लखनऊ सुपर जायंट्सविरुद्ध अवघ्या 37 चेंडूंत 93 धावांची वादळी खेळी केली होती. त्याचा 190 पेक्षा जास्त असलेला स्ट्राईक रेट आणि फिरकीपटूंना सहजतेनं मारलेले षटकार पाहून अश्विननं त्याला वैभव आणि आयुषपेक्षा वरचं स्थान दिलं आहे.

अश्विननं आपल्या विश्लेषणात नमूद केलं की, “वैभव सूर्यवंशी आणि आयुष म्हात्रे यांच्याकडे प्रचंड प्रतिभा आहे आणि त्यांनी या हंगामात ते सिद्धही केलं आहे. मात्र, प्रियांश आर्या हा तांत्रिकदृष्ट्या अधिक ‘कम्प्लीट’ (पूर्ण) खेळाडू वाटतो. तो ज्या सहजतेनं गोलंदाजी समजून घेतो आणि मोठे फटके मारतो, ते पाहता तो या दोघांपेक्षा अधिक स्थिर आहे. मला वाटतं की प्रियांशमध्ये भविष्यात भारतीय संघाचा मोठा आधारस्तंभ बनण्याची सर्व लक्षणं आहेत.”

आतापर्यंतच्या पाच सामन्यांमध्ये प्रियांशने 42.2 च्या सरासरीने आणि 248 पेक्षा जास्त स्ट्राईक रेटने 211 धावा केल्या आहेत.

दरम्यान, हॅमस्ट्रिंगच्या दुखापतीमुळे म्हात्रे आयपीएल 2026 च्या उर्वरित सामन्यांमधून बाहेर झाला आहे. तो यावर्षी सीएसकेचा सर्वाधिक धावा करणारा फलंदाज असून, त्यानं सहा डावांमध्ये 33.50 च्या सरासरीनं आणि 177.87 च्या स्ट्राइक रेटनं 201 धावा केल्या आहेत, ज्यात दोन अर्धशतके आणि 73 धावांच्या सर्वोत्तम धावसंख्येचा समावेश आहे.

दुसरीकडे, सूर्यवंशी हा स्पर्धेतील सर्वोत्तम कामगिरी करणाऱ्या खेळाडूंपैकी एक असून, त्यानं आतापर्यंत सहा सामन्यांमध्ये 246 धावा केल्या आहेत.

आर. अश्विन यंदाच्या आयपीएलमध्ये खेळाडू म्हणून सक्रिय नसला तरी, तो एक क्रिकेट तज्ज्ञ आणि विश्लेषक म्हणून नेहमी सक्रिय असतो. 500 हून अधिक कसोटी बळी घेणाऱ्या अश्विनची खेळातील तांत्रिक समज मजबूत आहे. त्यामुळे त्यानं प्रियांशबद्दल केलेल्या या विधानाची सोशल मीडियावर मोठी चर्चा रंगली आहे.